Grønare transport

Støtte til el-lastesyklar

For å redusere bilbruk i tronge sentrumsgater, og få ned dieseldriven varetransport i sentrum, gir Stavanger kommune støtte til bedrifter som skaffar og bruker elektriske lastesyklar i sentrum.

• Meir om støtte til el-lastesykkel
• No kan du leige el-lastesyklar

Kollektivtrafikk, bildeling og sykkelutleige

Bilkøyring fører til utslepp av klimagassar og helseskadelege stoff som nitrogenoksid (NO_x) og svevestøv. I Stavanger kjem over ein tredel av klimagassutsleppa frå vegtrafikken. Det er eit mål å redusere desse utsleppa. 

Dersom alle lét bilen stå éin dag i veka, ville utsleppa bli reduserte med 20 prosent.

Her er nokre gode alternativ til privatbil: 

• Bysykkel kan du leige billig i ein time på Kolumbus sin billett-app.
• Bussruter i Rogaland: www.kolumbus.no
• Togrutene til Vy, GoAhead og andre togselskap i Noreg (tidlegare NSB): www.vy.no
• Bildeling: Nye retningsliner og fleire parkeringsplassar skal gjere bildeling meir tilgjengeleg for privatpersonar, bedrifter og organisasjonar.Til saman blir det 21 parkeringsplassar på gateplan (kor fire plassar har lademoglegheit i dag) og 16 parkeringsplassar med lademoglegheit i parkeringshusa P-jernbanen, P- Jorenholmen og P-forum.
  • Bildelingsoperatørar kan søkje om parkeringsplassar hos Stavanger Parkering

HjemJobbHjem 

HjemJobbHjem er ei ordning som skal gjere det lettare å komme seg til og frå jobb utan bil. Ordninga er retta mot bedrifter og offentlege verksemder på Nord-Jæren. Tilsette i ei HjemJobbHjem-bedrift kan kjøpe rabatterte 30-dagers-billettar til buss, tog og nokre båtruter i Rogaland, og alle får tilgang til bysykkelen, uavhengig av HjemJobbHjem-billetten.

Bedriftene må gjennomføre ei reisevaneundersøking blant dei tilsette, og lage ein aktivitetsplan ut frå resultata. Alle bedrifter i Stavanger, Sandnes, Sola og Randaberg kan søkje om å bli ein del av HjemJobbHjem-ordninga.

Her kan du lese meir om ordninga.

Stavanger på sykkel

Stavanger på sykkel er satsinga til kommunen for å få fleire til å velje sykkel som transportmiddel i kvardagen. 

Finn sykkelruta di, hovudruter for sykkel i Stavanger og informasjon om sykkelparkering, bysyklar og vedlikehald av sykkelvegar.

Beintøft - bruk bein og ikkje bil til skulen!

Beintøft er ein kampanje som skal inspirere barn til å gå, sykle eller reise kollektivt til skulen. På dette viset får vi mindre forureining der vi bur, lufta blir reinare, området rundt skulen blir tryggare og det blir mindre CO₂–utslepp frå bilar.

Kvar haust blir barneskulane i byen invitert til ei tevling for å få flest moglege til å gå til skulen. Jo fleire i klassen som går i staden for å bli køyrd, desto større er sjansen for å vinne ein fin premie. 

Meir informasjon finst på nettsidene beintøft.no.

Elbil i Stavanger

I Stavanger finst det ladepunktet både på offentlege parkeringsplassar, i parkeringshus, på nokre kjøpesenter og hos bedrifter. Meir enn 400 ladepunkt er tilgjengelege for alle.

• Meir om lading av elbil i Stavanger

Europeisk mobilitetsveke og miljøsøndag

Miljøsøndag var ein viktig og populær del av den europeiske Mobilitetsveka i åra 2012-2019. Stavanger sentrum har då vore stengt for bilar og fylt med kjekke aktivitetar for familiar.

I 2020 vart Miljøsøndag avlyst på grunn av korona-pandemien, og i staden var det fleire mindre arrangement gjennom heile Mobilitetsveka. Også i 2021 er Miljøsøndag avlyst, grunna stor usikkerheit om høva til å halde store arrangement, men det blir igjen mykje aktivitet gjennom Mobilitetsveka.

Du kan lese meir om Miljøsøndag og Mobilitetsveka på www.miljøsøndag.no - der blir oppdatert informasjon lagt ut.