Temaplan for klima og miljø i landbruket

Kvifor ein temaplan om landbruk i Stavanger?

Stavanger er ein stor landbrukskommune, med eit aktivt jordbruk, mange husdyr og veksthus fulle av tomatar ute på øyane. Det var rett å vente med å foreslå tiltak i landbruket til folk i dei nye kommunedelane kunne bidra med idear og kunnskap for å styrkje både miljø- og landbruksinteressene i kommunen.

Kva inneheld planen?

Første del av planen beskriv landbruket i kommunen, og moglegheitene hos aktørane i landbruket til å bidra til å løyse klima- og naturkrisa vi står i.

I nokre høve vil landbruket skade naturen, som når sprøytemiddel og næringsstoff går tapt frå åker og eng og havnar i overgjødsla innsjøar. I andre høve tek landbruket vare på vakre og sjeldne landskap, som når sauen beitar kystlyngheia på Rennesøy.

Planen peikar mellom anna på dei store klimagassutsleppa vi får ved dyrkjing og nedbyggjing av myr, og ved forbrenning av fossil naturgass til oppvarming av veksthusa. Sidan kommunen både har eit stort overskot av husdyrgjødsel og mange veksthus å varme opp, blir moglegheitene for etablering av eitt eller fleire biogassanlegg løfta fram.

Jordhelse er òg ein viktig del av planen. Vi må ta vare på jordlivet og jordstrukturen for å hindre avrenning til vassdrag, redusere utslepp av lystgass og metan og gi gode avlingar. Slik kan god agronomi òg gi gode verknader for miljøet.

Andre del av planen er handlingsdelen, som er laga i tabellform. Her er framlegg til tiltak beskrive. Vi konkretiserer kven som har ansvar for å gjennomføre tiltaka, og peikar på korleis dei ulike tiltaka kan finansierast.

Tiltaka skal bidra til å:

• Redusere utslepp av klimagassar
• Styrke biologisk mangfald i landsbruksområda
• Gi reine vatn og vassdrag
• Gi mindre avfall og miljøgifter
• Styrke forbrukarmakta og meir økologisk landbruk

Les eller last ned planen

Last ned PDF-utgåva, eller les planen her: